Patriarku i Jerusalemit u takua me Presidentin Tasulas në Pallatin Presidencial

Në një atmosferë të ngrohtë u zhvillua sot, të martën më 9 qershor 2026, takimi i Presidentit të Republikës së Greqisë, Konstantinos Tasulas, me Patriarkun e Jerusalemit, Theofilin III, në Pallatin Presidencial, në prani të zëvendësministreve të Jashtme Aleksandra Papadopulu dhe Janis Loverdos.

Gjatë takimit u riafirmua vullneti i të dy palëve për forcimin dhe ngritjen në një nivel më të lartë të bashkëpunimit.

Presidenti Tasulas e priti Patriarkun e Jerusalemit duke shprehur respektin e tij të thellë dhe duke theksuar se Greqia është e lidhur ngushtë dhe në mënyrë të vazhdueshme me Patriarkanën e lashtë Greko-Ortodokse të Jerusalemit, përmes lidhjeve shpirtërore, historike dhe kombëtare.

Ai theksoi se vizita “shënon vullnetin e Greqisë për vazhdimin dhe përmirësimin e bashkëpunimit me Patriarkanën e Jerusalemit, me shembull konkret nënshkrimin e Memorandumit të Bashkëpunimit me Ministritë e Jashtme dhe të Kulturës për mirëmbajtjen e relikteve dhe monumenteve”.

Presidenti grek shtoi se “në një kohë plot sfida, konflikte dhe pasiguri, mesazhi i paqes, dialogut dhe solidaritetit që përcjell Kisha merr një rëndësi të veçantë”, duke theksuar se “Vendet e Shenjta duhet të mbeten vende lutjeje, mirëkuptimi, shprese dhe dashurie për të gjithë popujt”.

Ai tha gjithashtu se Greqia njeh dhe mbështet në mënyrë të vazhdueshme veprën dhe misionin e lartë të Patriarkanës Greko-Ortodokse të Jerusalemit dhe të Vëllazërisë së Varrit të Shenjtë për ruajtjen e pranisë dhe trashëgimisë së krishterë në Lindjen e Mesme, si edhe për mbrojtjen e vendeve të shenjta të pelegrinazhit.

Në mënyrë të veçantë, Presidenti Tasulas vlerësoi kontributin e Patriarkanës gjatë krizës së fundit në Gazë dhe rolin e saj në mbështetjen e mbrojtjen e komuniteteve të krishtera në rajon. Në njohje të këtij kontributi, shteti grek vendosi t’i japë dekorata nderi Kryepiskopit të Tiberiadës dhe igumenit të Manastirit të Shën Porfirit në Gazë, si edhe arkimandritit Sila, si shenjë nderimi për shërbimin e tyre në kushte lufte.

“Ripagëzim” i marrëdhënieve

Nga ana e tij, Patriarku i Jerusalemit, Theofili III, pasi falënderoi Presidentin e Republikës Greke për pritjen e ngrohtë, foli jo thjesht për “përmirësim”, por për “ripagëzim” të marrëdhënieve të Greqisë me Patriarkanën e Jerusalemit.

Duke iu referuar misionit që, sipas tij, Zoti i ka besuar Patriarkanës së Jerusalemit, ai foli për ruajtjen e vendeve të shenjta si vende liturgjie dhe adhurimi. Patriarku theksoi se, po të mos ekzistonte Patriarkana e Jerusalemit me Vëllazërinë e sotme të Varrit të Shenjtë, vendet e shenjta do të ishin rrënuar dhe ato që do të kishin mbetur do të ishin vetëm hapësira arkeologjike.

Ai nënvizoi se Patriarkana e Jerusalemit “është një institucion krejtësisht shpirtëror dhe misioni i saj është të shërbejë, të ndihmojë dhe të dëshmojë vlerat morale të Shkrimit të Shenjtë, si edhe respektin e plotë ndaj personit njerëzor, i cili konsiderohet ikonë e Perëndisë”.

Patriarku tha gjithashtu se “Varri i Shenjtë është kulmi i të gjitha pelegrinazheve dhe pika e referimit për unitetin e të gjithë të krishterëve, të të gjitha konfesioneve”. Sipas tij, “po të mos ekzistonte Patriarkana e Jerusalemit dhe qëndrimi që ajo mbajti në disa çështje dhe kriza kishtare, sot Orthodhoksia do të ishte copëzuar”.

Presionet për zbrazjen e Manastirit të Shën Porfirit

Patriarku nuk i fshehu problemet e mëdha dhe presionet që, sipas tij, u ushtruan nga faktorë politikë dhe ushtarakë për zbrazjen e Manastirit të Shën Porfirit në Gazë.

Ai tha se, me ndihmën e Zotit, manastiri u mbrojt, por vuri në dukje se “edhe sot përballemi me një problem: nëse del nga Gaza hierarku Aleks i Tiberiadës ose arkimandriti, ata nuk do të mund të kthehen përsëri”.

Dekoratat për Kryepiskopin e Tiberiadës dhe arkimandritin Sila

Presidenti i Republikës së Greqisë, Konstantinos Tasulas, në një ceremoni të posaçme të zhvilluar të martën, më 9 qershor 2026, në Pallatin Presidencial, i dha titullin e Komandantit të Lartë të Urdhrit të Nderit Kryepiskopit të Tiberiadës, Aleksit, dhe Kryqin e Artë të Urdhrit të Nderit arkimandritit Sila.

Dekoratat i mori vetë Patriarku i Jerusalemit, Theofili III.

Duke marrë dekoratat, Patriarku i Jerusalemit falënderoi shtetin grek dhe Ministrinë e Jashtme për nismën, duke theksuar se ajo “është një injeksion moral për forcimin e misionit tonë”.

Lexo gjithashtu