Besimtarë nga Ormilia vizituan Mitropolinë e Korçës

Në datën 02 06 2026, Mitropoliti i Korçës, Hirësia e Tij Imzot Anastasi, priti një grup besimtarësh nga Ormilia e Halkidhikisë në Greqi, të cilët zhvilluan një vizitë fetare, shpirtërore dhe kulturore në disa vende të rëndësishme të Mitropolisë së Korçës.

Grupi vinte nga famullia e Shën Gjergjit, i shoqëruar nga klerikët përgjegjës. Gjatë qëndrimit në Korçë, vizitorët u njohën nga afër me jetën kishtare dhe me disa prej monumenteve më të rëndësishme të kësaj treve.

Ata vizituan Kishën Mitropolitane të Burimit Jetëdhënës, e cila po merr gradualisht formën e saj historike, para ndërhyrjeve dhe shndërrimit në muze rreth viteve 1980.

Më pas, grupi vizitoi edhe kishën historike të Ristozit, të njohur si kisha e Analipsit ose e Ngjitjes së Zotit në Qiell, në Mborje. Ky monument mbetet një nga dëshmitë më të çmuara të trashëgimisë kishtare në zonën e Korçës.

Pjesë e vizitës ishte edhe Manastiri i Fjetjes së Hyjlindëses në Boboshticë, një vend i lidhur ngushtë me kujtesën shpirtërore dhe historike të besimtarëve të kësaj krahine.

Besimtarët dhe famullitarët nga Ormilia u shprehën të gëzuar nga kjo vizitë, e cila bashkoi lutjen, njohjen e trashëgimisë dhe takimin vëllazëror ndërmjet komuniteteve orthodhokse.

Vizita të tilla forcojnë lidhjet shpirtërore ndërmjet besimtarëve orthodhoksë dhe ndihmojnë në njohjen më të mirë të historisë së Kishës në Shqipëri.

Mikpritja e Mitropolitit Anastas dhe kujdesi i tij për vizitorët dëshmojnë vëmendjen baritore ndaj të gjithë atyre që vijnë për të njohur nga afër vendet e shenjta të Mitropolisë së Korçës.

UGO

Foto
Mitropolia e Shenjtë e Korçës

Lexo gjithashtu