Mitropoliti Anastas meshoi në kishën e Shën Triadhës në Tudas

Në Ditën e Shpirtit të Tërëshenjtë, Mitropoliti i Korçës, Hirësia e Tij Imzot Anastasi, meshoi në kishën e Shën Triadhës në Lavdar të Tudasit, pranë liqenit të Moglicës.

Kisha ndodhet në një nga pikat kufitare të Mitropolisë së Korçës me Mitropolinë e Beratit. Rruga për të mbërritur në këtë vend të bekuar nuk është e lehtë, ndaj pjesëmarrja e besimtarëve mori edhe më shumë kuptim shpirtëror.

Hirësia e Tij u shoqërua nga Atë Ilia Kotnani, Atë Thoma Samara, Kryedhiakoni Kristin Nasi dhe dhjakon Konstantin Meko. Liturgjia Hyjnore u krye në një atmosferë të veçantë mallëngjimi dhe emocioni.

Kisha e Shën Triadhës në Lavdar i përket fillimit të shekullit XV dhe ruan vlera të rëndësishme historike e shpirtërore. Prej kohësh nuk mbahet mend që një Mitropolit të ketë meshuar në këtë kishë të shenjtë, gjë që e bëri këtë kremtim edhe më domethënës për besimtarët e pranishëm.

Vizitat dhe meshimet e Mitropolitit Anastas edhe në pikat më të largëta të Mitropolisë sjellin një frymë gjallërie shpirtërore. Ato ringjallin kujtesën e trashëgimisë orthodhokse në këtë zonë dhe i ndihmojnë besimtarët të njohin vende të shenjta, kisha dhe monumente që shumë prej tyre nuk i kishin vizituar më parë.

Kremtimi në Lavdar ishte një kujtesë se Kisha jeton jo vetëm në qendrat e mëdha, por edhe në vendet e largëta, ku lutja, historia dhe besimi ruhen si pjesë e gjallë e jetës dhe trashëgimisë së vyer të Mitropolisë së Shenjtë Korçë.

Burimi: UGO / Mitropolia e Shenjtë e Korçës.

UGO / Mitropolia e Shenjtë e Korçës

Mitropoliti i Korçës, Hirësia e Tij Imzot Anastasi, gjatë Liturgjisë Hyjnore në kishën e Shën Triadhës në Lavdar të Tudasit.

Lexo gjithashtu