Analipsi, Ristozi, Ngjitja e Zotit në Qiell u kremtua në kishën bizantine të Mborjes

Me madhështi dhe përshpirtëri u kremtua festa e madhe zotërore e Ngjitjes së Zotit Krisht në Qiell, e njohur në traditën kishtare si Analipsi, në Mitropolinë e Shenjtë të Korçës.

Kremtimi u zhvillua në Kishën e Analipsit në fshatin Mborje, një nga kishat më të rëndësishme bizantine të zonës. Ky monument i lashtë, i ndërtuar në vitin 1398, përbën një dëshmi të çmuar të pranisë së hershme të krishterimit dhe të trashëgimisë orthodhokse në krahinën e Korçës.

Si çdo vit, Liturgjia Hyjnore u kremtua në ambientet e jashtme të kishës, në natyrë, duke krijuar një atmosferë të veçantë lutjeje dhe bashkimi shpirtëror. Besimtarë të shumtë morën pjesë në meshë, duke nderuar festën e Analipsit dhe duke u bashkuar në gëzimin e Kishës.

Meshën Hyjnore e udhëhoqi At Spiro Katundi, me pjesëmarrjen e dhjetëra besimtarëve nga fshati Mborje dhe zona përreth.

Festa e Ngjitjes së Zotit në Qiell kujton ngjarjen kur Krishti, pas Ngjalljes së Tij dhe pas shfaqjeve te nxënësit, u ngrit në qiell me trupin e Tij të lavdëruar. Për Kishën, kjo festë është mesazh shprese dhe lavdie, sepse tregon se natyra njerëzore, e marrë nga Krishti, ngrihet pranë Perëndisë.

Kremtimi në Mborje kishte edhe një rëndësi të veçantë historike, pasi u zhvillua pranë një kishe që për shekuj ka qenë vend lutjeje, kujtese dhe qëndrese shpirtërore për besimtarët e zonës.

Kisha e Analipsit në Mborje mbetet një nga thesaret më të çmuara të trashëgimisë orthodhokse kishtare dhe kulturore të Korçës, duke dëshmuar lidhjen e gjallë të popullit me besimin, traditën dhe historinë orthodhokse.

Lexo gjithashtu