Shën Theodhora Peloponeziane, murgeshën që u fsheh si burrë

Shën Theodhora ishte me origjinë nga Peloponezi, tokë që ka nxjerrë shenjtorë dhe heronj; për këtë arsye, nga disa quhet edhe Shën Theodhora «Peloponeziane». Për sa i përket vendlindjes së saj, krahinat më të mundshme duket se janë Arkadia dhe Mesenia. Ajo jetoi në shekullin IX pas Krishtit — sipas disa të tjerëve, në shekullin X — pra, në kohën e Perandorisë Bizantine.

Prindërit e saj ishin njerëz të varfër dhe të panjohur, por e donin Perëndinë dhe ua përcollën fëmijëve të tyre besimin në Krishtin. Që në moshë të vogël, Theodhora, ndryshe nga vëllezërit dhe motrat e saj, shfaqte një dashuri dhe prirje të veçantë për gjërat hyjnore. Ajo e donte Perëndinë aq shumë, sa dëshironte t'ia kushtonte Atij tërë jetën e saj. Ditë pas dite fitonte atë që Etërit e Shenjtë e quajnë «dashuri e zjarrtë për Krishtin».

Kur u rrit, vendosi të jetonte në një manastir dhe atje të kultivonte dashurinë e saj për Krishtin. Mirëpo, e pazakonta ishte se ajo nuk zgjodhi një manastir grash, por një manastir burrash! U paraqit si burrë, me emrin «Theodhor», në manastirin e «Panajicës», i cili ndodhet në kufirin ndërmjet krahinave të Arkadisë dhe Mesinisë. Nuk mund ta themi me siguri arsyen përse veproi kështu. Ndoshta dëshironte të zhdukej krejtësisht nga sytë e të njohurve të saj.

Në manastirin e burrave ku u vendos, nuk vonoi të bëhej shembull durimi, bindjeje dhe përulësie. Këto virtyte e çonin gradualisht drejt një përparimi të madh shpirtëror, i cili njihej si nga igumeni, ashtu edhe nga bashkëvëllezërit e manastirit. Etërit e manastirit, duke admiruar personalitetin dhe dhuntitë që e dallonin, i besuan punët e jashtme të manastirit. Në të vërtetë, në këtë shërbesë caktohen gjithmonë murgj ose murgesha me përvojë në jetën shpirtërore.

Në të njëjtën periudhë, në rajonin e gjerë të Peloponezit ra një zi e tmerrshme buke, aq sa populli dhe manastiri rrezikuan të vuanin nga uria. Të gjithë Etërit i kthyen sytë nga «Theodhori», si i vetmi që mund të ndihmonte në këtë gjendje kaq të vështirë. Dhe vërtet, «Theodhori» vizitoi shumë shtëpi të krishterësh, me qëllim që t'i mbështeste dhe, nëse ishte e mundur, të siguronte diçka edhe për vëllazërinë monastike.

Mirëpo, ndodhi diçka e tmerrshme! Një grua ngriti kundër tij një akuzë shumë të rëndë: — Ky murg më la shtatzënë! Lajmi u përhap me shpejtësi! Tashmë ishte ngritur një shpifje e rëndë. Prindërit e gruas shtatzënë, të zemëruar, u ngjitën në manastir dhe e urdhëruan me dhunë «Theodhorin» që t'i ndiqte. «Murgu», megjithëse e mohoi akuzën, nuk kundërshtoi që të shkonte me ta.

Më pas e gjykuan me procedurë të përshpejtuar dhe e shpallën fajtor. U dënua me dënimin më të rëndë: «vdekje me prerje të kokës». Megjithëse mund ta provonte pafajësinë e saj duke zbuluar trupin, parapëlqeu ta «mbante» mbi vete peshën e shpifjes! Si vend i martirizimit u caktua fshati Vasta, në krahinën e Arkadisë. Ekzekutuesi e çoi deri atje, ndërsa «Theodhori» e ndiqte «si qengj pa zë».

Pak më vonë, shpirti i Shën Theodhorës fluturoi drejt qiellit, në vendin e përgatitur për oshënaret virgjëresha martire të Kishës sonë. Ekzekutuesi dhe bashkëpunëtorët e tij, të cilët e kishin prerë kokën e martires, panë trupin e saj të zhveshur dhe, të penduar, kërkuan falje nga Perëndia. Ngjarja e mrekullueshme u bë e njohur kudo!

Igumeni dhe bashkëvëllezërit e manastirit, duke vajtuar, mbërritën në vendin e martirizimit dhe, duke lavdëruar Perëndinë, e varrosën trupin e saj në manastirin e tyre të shenjtë ose, sipas mendimit të disa të tjerëve, pikërisht në vendin e martirizimit. Thuhet se, përpara se t'i pritej koka, shenjtorja i kërkoi Perëndisë që trupi i saj të bëhej kishë, flokët e kokës së saj të shndërroheshin në pemë dhe gjaku i saj në lumë.

Dhe vërtet, mbi çatinë e kishës së ngritur në Vasta të Arkadisë mbinë 17 pemë, të cilat, në mënyrë të pashpjegueshme, qëndrojnë mbi çati dhe dëshmojnë se: «Atje ku dëshiron Perëndia, mposhtet rendi i natyrës.»

Një jetëshkrim të hollësishëm të shenjtores ka shkruar Mitropoliti i Gortinës dhe Megalopolit, z. Theofil. Së fundi, duhet të vërejmë se jetëshkrimi i kësaj shenjtoreje ka mjaft elemente të përbashkëta me atë të Shën Theodhorës së Aleksandrisë, kujtimi i së cilës kremtohet po në të njëjtën ditë.

Lexo gjithashtu