Mitropolia e Korçës priti dy vizita miqësore

Foto Mitropolia e Shenjtë Korçë

Mitropolia e Korçës priti dje dy vizita miqësore, të cilat u zhvilluan në frymë respekti dhe dashamirësie. Sipas burimeve të Mitropolisë, të dyja takimet dëshmuan rëndësinë e dialogut ndërkomunitar dhe vlerësimin e ndërsjellë ndërmjet bashkësive fetare e civile të Korçës.

Vizita e parë ishte ajo e Ipeshkvit Mitropolit të Agrigentos në Siçili, Alessandro Damiano, i Kishës Katolike, i cili u prit nga Mitropoliti i Korçës, Hirësia e Tij Anastas. Biseda mes tyre u zhvillua në frymë të ngrohtë dhe pozitive, duke reflektuar shpirtin e mirëkuptimit dhe të respektit të ndërsjellë. Në fund të takimit, Ipeshkvi Damiano dhuroi një figurë të së Tërëshenjtës në porcelan, ndërsa Mitropoliti Anastas i ofroi një faksimile të Katërungjillëshit të Korçës — një botim me vlera të veçanta kishtare dhe kulturore.

Vizita e dytë ishte ajo e Nertil Joles, ish-Prefekt i Qarkut të Korçës, i cili zhvilloi një takim miqësor me Mitropolitin Anastas. Gjatë bisedës u shkëmbyen mendime dhe vlerësime për komunitetin, qytetin e Korçës dhe çështje të jetës shoqërore. Në shenjë respekti dhe falënderimi për shërbimin ndaj komunitetit ortodoks dhe frymës së shëndoshë të bashkëjetesës fetare, Nertil Jole i dhuroi Hirësisë së Tij ikonën "Ngjallja", e realizuar nga ikonografi i njohur korçar Vangjel Nikolla.

Të dyja vizitat nënvizuan rolin e Mitropolisë së Korçës si urë lidhëse ndërmjet bashkësive fetare dhe civile, duke promovuar bashkëpunimin dhe dialogun në nivel lokal e ndërkombëtar.

Nuk është hera e parë që Mitropolia e Korçës tërheq vëmendjen e vizitorëve nga komunitete të ndryshme; kohët e fundit raportuam mbi takimin kur grupet e katekizmit nga Follorina vizituan Mitropoline e Korçës.

Lexo gjithashtu